У Гродне ўратуюць ад разбурэння капліцу генерала Русаў на вайсковых могілках

15 августа 2022 в 09:51

Лютэранская капліца-пахавальня генерал-маёра Аляксандра Русаў на Вайсковых могілках на вул. Белуша дачакалася аднаўлення. Працы будуць праведзеныя ў межах бягучага рамонту, каб захаваць пабудову на будучыню.

Капліца Русаў — зараз найстарэйшы аб’ект на вайсковых могілках — знаходзіцца ў кепскім стане, з яе абвальваецца плітка. Яна была збудаваная ў стылі эклектыкі з элементамі рэтраспектыўна-гатычнага стылю.

Капліца-пахавальня. Фота: Facebook Ірына Варкулевіч

Грошы на аднаўленне капліцы шукала лютэранская абшчына з 2019 года. Зараз фінансаванне вылучылі ў рамках дзяржаўнай праграмы «Культура Беларусі» на 2021–2025 гг. Аб'ём работ запланаваны невялікі, але патрэбны для таго, каб капліца працягнула існаваць, распавяла Urban Hrodna архітэктар Алена Шчасная, навуковая кіраўнічка аб'екта.

Галоўнае — абараніць капліцу ад вады

У капліцы збіраюцца аднавіць дах, кладкавыя швы і вадасцёкавую сістэму: калісьці вадасцёкі зніклі і зараз вада сцякае проста па сценах, руйнуючы іх. Таксама зробяць адмостку па перыметры капліцы, заменяць страчаныя цэглу на кутніх карнізах, зашкляць захаваныя металічныя пераплёты вокнаў, адрэстаўруюць металічныя дзверы.

Абследаванне капліцы-пахавальні. Фота: Facebook Ірына Варкулевіч

Таксама плануюць узнавіць страчаныя каменныя крыжы з ружовага граніту і дэкаратыўныя разеткі з пясчаніку паводле захаваных аналагаў, магчыма аднаўленне ўваходнага ганка.

— Калі хопіць грошай, зробім больш. Але ўсё даражэе, калі праграма [«Культура Беларусі»] фармавалася, цэны на матэрыялы былі адны, зараз — іншыя. Будзем глядзець, што трэба ў першую чаргу, — патлумачыла Алена Шчасная.

Чаму важна захаваць капліцу

Зараз нашчадкаў Русаў не засталося, сачыць за пахаваннем няма каму. У 2019 годзе на капліцы з’явіліся таблічкі пра небяспеку падыходзіць бліжэй за 10 м — з помніка абвальвалася плітка і цэгла. Сродкі на рэстаўрацыю тады шукала сучасная гродзенская абшчына лютэран, але рэстаўрацыя не пачалася.

Капліца не толькі найстарэйшы аб'ект на могілках, але і частка архітэктурнай спадчыны горада, якую важна захаваць.

— Архітэктурная спадчына — гэта маркеры развіцця горада ў розныя перыяды і стагоддзі, якія адлюстроўваюць узровень жыцця гараджан, тэхналогіі будаўніцтва, нацыянальны склад насельніцтва і канфесіі, якія пераважаюць, правілы ўшанавання і захавання памяці тых, хто пайшоў у іншы свет, — лічыць Алена Шчасная.

Нашли опечатку? Выделите фрагмент текста с опечаткой и нажмите Ctrl + Enter.

Одежда
и аксессуары Соберись, тряпка!