Біблія князя Радзівіла

Спектакль «Біблія князя Радзівіла» прысвечаны 500-гадоваму юбілею Мікалая Радзівіла Чорнага (1515–1565), аднаго з самых вядомых гістарычных дзеячаў Беларусі XVI ст. Мікалай Радзівіл Чорны быў адным з галоўных лідараў руху Рэфармацыі, займаў найвышэйшую дзяржаўную пасаду канцлера Вялікага Княства Літоўскага. Ён заснаваў першую на тэрыторыі сучаснай Беларусі друкарню ў Брэсце (1553 г.), у 1563 г. надрукаваў славутую Берасцейскую Біблію.

Як фактычны кіраўнік Вялікага Княства Літоўскага, Мікалай Радзівіл Чорны спрычыніўся да адной з самых удалых эканамічных рэформаў у нашай гісторыі — Валочнай памеры (1557 г.), а таксама да падрыхтоўкі другой рэдакцыі Статута ВКЛ (1566 г.).

Імя Мікалая Радзівіла Чорнага ўнесена ў падручнікі па гісторыі нашай краіны. У 2009 г. у г. Брэсце быў устаноўлены помнік гэтаму славутаму дзеячу гісторыі і культуры Беларусі. 500-годдзе Мікалая Радзівіла Чорнага шырока адзначаецца ў нашай краіне. У лютым 2015 г. РУП «Белпошта» выпусціла спецыяльны юбілейны канверт і марку да юбілею Мікалая Радзівіла Чорнага, «БелЗнешРэклама» устанавіла па ўсёй краіне дзясяткі білбордаў з выявай яго, Нацыянальны банк Рэспублікі Беларусь выпусціў у абарачэнне 2 памятныя манеты «Мікалай Радзівіл Чорны» ў серыі «Умацаванне і абарона дзяржавы».

Назва спектакля звязана з тым, Мікалай Радзівіл Чорны з’яўляўся адным з лідараў руху Рэфармацыі, што ахапіў нашу краіну ў XVI ст., прадстаўнікамі якога з’яўляюцца Францыск Скарына, Сымон Будны, Васіль Цяпінскі і многія іншыя славутыя постаці айчыннай гісторыі.

Дзеянне спектакля ахоплівае 2 гады з 1551 па 1553 г. П’еса прысвечана складанаму выбару ў жыцці маладога канцлера. У выніку, ён цвёрда вырашае ісці па шляху служэння Богу і Айчыне.

Спектакль рыхтуе творчы калектыў пад кіраўніцтвам лаўрэата Нацыянальнай тэатральнай прэміі Беларусі, актора і рэжысёра Нацыянальнага акадэмічнага тэатра імя Янкі Купалы Паўла Харланчука-Южакова.

Аўтар сцэнарыя — кандыдат гістарычных навук, загадчык аддзела гісторыі беларускай дзяржаўнасці Інстытута гісторыі НАН Беларусі А.У. Унучак.